Errekako emakumeek kopa ere irabazi dute ‘doblete’ historikoa lortzeko - Mendialdea - Erran.eus
Futbolean, oraindik ez du ligako txapeldun izatea segurtatu Doneztebek eta promozio postutik atera da Baztan eta errugbian, Frantziako txapelketako final zortzirenetara sailkatu da Sarako Izarra taldea Landetan lortutako garaipen garbi batekin
Maiatzaren 3an liga irabazi zuen Errekako emakumeen eskubaloi taldeak historian lehen aldiz, eta bi aste beranduago, kopa ere irabazi dute, berriz ere BM Ardoi taldearen kontra, baina oraingoan, zailagoa oraindik, Zizur Nagusian. Beraz, asteburu honetan Errenterian jokatuko duten sektoreko txapelketaren atarian, doblete historikoa lortu dute. Futbolean, Nafarroako lehen maila autonomikoan berri txarrak, Doneztebek berdindu eta Baztanek galdu egin baitute. Honela, doneztebarrek oraindik ez dute ligako txapeldun izatea segurtatu eta baztandarrak bosgarren dira orain, promozio postutik kanpo. Doneztebek Gazte Berriak Ansoain izanen du arerio datorren asteburuan Donezteben, final kutsuko norgehiagokan. Izan ere, hiru puntura bigarren postuan dago Antsoaingo taldea, baina oraindik igoera matematikoki segurtatu gabe du. Berdinketa aski luke Doneztebek, oraingoan bai, partida baten faltan ligako txapeldun izateko. Baztanek, berriz, nahitaezkoa du garaipena promozio postuetatik ez urruntzeko. Gipuzkoako ligan, Beti Gaztek berdindu egin zuen Zumaian eta Gure Txokoak galdu egin zuen etxean. Errugbian, Frantziako txapelketako final zortzirenetara sailkatzea lortu du Sarako Izarra errugbi taldeak, Landetan garaipen garbia lortu eta gero.
TTIPI-TTAPA / ERRAN
Xorroxin Irratia
