காலை பூசையில்தான் கவனித்தேன்
சாமிப் படத்திற்குப் பின்னிருந்த
அந்தக் கரப்பானை,

சட்டெனப் பிடித்தெறிய
நீண்ட கையைச்
சடக்கென்று நிறுத்தியது
மூளைக்குள் ஒரு கேள்வி:

ஒருவேளை இது
கடவுளாய் இருந்தால்?

"மெச்சினேன் உன் பக்தியை"
எனும் முன்
நசுக்கிவிடக் கூடாதே!

நசுக்கவா? நமஸ்கரிக்கவா?
என நான்
மனத்திற்குள் பட்டிமன்றம்
நடத்திக்கொண்டிக்கும்போதே
அதன்மீது
மருந்தடித்துவிட்டாள் என்
மனைவி!

©2019, Vennkotran.

இன்னும் உறக்கமென்ன? எழுக கதிரோனே!
சின்னஞ் சிறுபறவை தெருநாய் கூட்டங்களும்
முன்னம் எழுந்திங்கே மூழ்கின தம்பணியில்,
பொன்னங் கதிர்பரப்பிப் பொழுதை மலர்விப்பாய்...

உன்றன் ஒருதேரின் ஒருசா ரதியருணன்
முன்னஞ் சிவந்தெழுக, முரணில் சந்தங்களால்
இன்னே பெயர்பெற்ற ஏழு புரவிகளாம்
பொன்னங் கதிர்பரப்பிப் பொழுதை மலர்விப்பாய்...

#கலிவிருத்தங்கள்

©2019, Vennkotran.

எறும்பு மருந்து வாங்க கடைவீதிக்குச் சென்றேன் மகளுடன்.

"ஏம்பா, நம்ம வீட்டு எறும்புகளுக்கு உடம்பு சரியில்லையா?" என்று அப்பாவியாகக் கேட்டாள்.

மருந்து வாங்காமல் திரும்பி விட்டோம்!

உலகம் குழந்தைகளுக்கானதாகவே இருந்திருக்கலாம்.
✍🙏🌹

#படித்தவற்றில்_பிடித்தது

கருமேகம் மறைப்பதனால் கதிரோன் வானில்
சுருண்டொதுங்கி நின்றிடுமா? காலைப் போழ்து
விரியாமல் போய்விடுமா? விடியும் நன்றே!
சொரிகின்ற மழைநன்றாய்ச் சொல்லும் வாழ்த்தே!

அதிகாலை மென்னிருளும் அளவாய்க் காற்றில்
பொதிந்துள்ள இன்குளிரும் பொழியும் தூறல்
விதிக்கின்ற இன்பமொடு விடியல் நன்றாய்
புதுநாளைப் பரிசளித்துப் புகலும் வாழ்த்தே!

இனிய காலை வணக்கம் தோழமைகளே...

#கலிவிருத்தம்

©2019, Vennkotran.