【其實用Mastodon都幾有我最初用Facebook嘅感覺……】

當年我開始用Facebook，仲係一個只係會貼廢文嘅小學雞。嗰時Facebook冇內容農場，廣告仲係喺sidebar而唔係撈埋入wall，就連page嘅功能都係有咗冇耐。

當時我個Facebook用緊本名，Friends得姑姐、表姐、老師、同學，成個wall都係睇大家啲生活相，睇人哋結婚、去旅行、甚至食個拉麵咁。

但唔知幾時開始，Facebook成個wall得返廣告、內容農場、心理測驗、新X期、糕trip之類嘅嘢，全部都係即食嘅片/圖，碌幾分鐘都冇見唔到一個朋友嘅近況。

講真，呢啲嘢係咪我當初用Facebook想睇到嘅嘢？而只係習慣咗Facebook俾乜我睇我就照單全收？

可能唔係得我咁……我其實由一年前已經嘗試叫朋友們組團離開Facebook，去twitter又好、Plurk又好，但大家仍然留戀喺Facebook。

我呢一刻，覺得Facebook已經唔係我想要嘅社交網站，因而走到黎Mastodon（仲有twitter）。希望今次所謂「移民潮」，可以令部份人搵返當初用社交網站嘅原因啦。

（咁樣就500字）