Herria aldizkariak argitaratutako testuak digitalizatu eta erabiltzaileen eskura jarriko ditu Euskaltzaindiak

Euskaltzaindiak eta Herria aldizkaria kudeatzen duen elkarteak lankidetza hitzarmena sinatu dute ortzirale honetan Baionako Herriko Etxean. Peio Jorajuria Herria elkarteko presidenteak eta Andres Urrutia euskaltzainburuak izenpetu dute hitzarmena. Akordio horri esker, Euskaltzaindiak 1944tik 2028ko abenduaren 31 bitartean Herriak argitara eman dituen eta emanen dituen testuak digitalizatzeko konpromisoa hartu du, testu horiek erabiltzaileen eskura jarriz.