今日有對父女帶貓黎睇醫生，因為貓貓 Lam 到手腳都無晒毛，我哋解釋佢哋知 Lam 到咁可能係皮膚敏感搞到痕，亦可能因為覺得有生活壓力而形成咗壞習慣 (情況類似人咬指甲)。

因為係熟客，我就用朋友嘅方式同佢哋傾多幾句，我問個女 (都唔後生，應該係廿到尾左右)：係咪你成日要抱住佢搞到佢覺得好大壓力？

阿女答：唔會卦。

我問：咁你抱佢嗰陣佢咩反應？有無掙扎想走？

阿女答：有呀，次次抱佢佢都掙扎。

我話：咁可能佢真係唔中意人抱，你就唔好逼佢啦。

阿女話：下？養隻貓唔抱得，咁我養黎做咩？

我話：要任抱就不如養 Hello Kitty  我知你好錫佢，但你要明白你比佢嘅唔一定係佢喜歡嘅。養貓其實係一個可以好好學習同人相處嘅機會，正如如果你話你好中意我，日日拎牛奶黎比我飲，但我飲完次次都肚痾，咁你係對我好定係害咗我？

阿女無出聲，諗緊嘢。

阿爸話：Karen 真係好好架，佢唔單止教我哋養貓，仲教我哋做人。

阿世伯真係抬舉  而其實我把握今次機會同阿女講人生道理，係因為之前留意到佢哋父女之間嘅相處有少少問題。