睇完「挑戰者1號」，我無乜特別感覺，可能呢類型嘅戲從來都唔係我心水。不過套戲頗多犯駁位同蠢野值得一提（下面有劇透，未睇但又會睇嘅朋友就唔好再讀落去）：

1）整體來講啲角色都好蠢，好似男主角Wade會向虛擬世界嘅人透露自己嘅真正身份，此乃打機嘅人一般都唔會犯嘅大忌；而奸角Sorrento蠢到將密碼黐喺自己部機度，邊有人蠢到咁都可以做到CEO？

2）根據Wade架van仔上面嘅剪報，Karen Underwood係喺1975年出世，但佢同Halliday約會時係喺2025年，即係當時已經50歲；但點解Karen個樣只係30歲左右？

3）Wade阿姨間屋被炸時，佢一啲傷感都無；佢唔係細細個就俾佢阿姨收養相依為命嘅咩？

4）成班打機嘅人對Halliday好似神咁拜，但喺現實世界裏面，打機嘅人唔會崇拜設計遊戲嘅人，甚至連邊個設計個遊戲佢地都未必會知。

5）呢套戲只係翻炒一堆八十年代嘅科幻電影，既無創意又無新意；如果當係歷史片咁搞，可能會好啲。

成套戲最好睇係飾演女主角Samantha嘅Olivia Cooke，又可愛又索。