動物都有情緒病。

動物唔識講嘢，佢痛唔識話你知，佢作病唔識講，佢唔開心唔知可以點樣令你知道。

「無從表達自己」本身已經可以構成好大嘅生活壓力。

之前喺公司見到一隻狗，自從佢主人生咗 BB 之後，對佢嘅關注少咗，佢開始亂吞嘢落肚搞到腸道阻塞要開刀，兩年內開咗五次肚！

有時面對呢類個案我哋都好無奈。我哋能夠做嘅只係針對佢嘅生理症狀去作出相應嘅治療，該食藥嘅開藥比佢食，該做手術嘅幫佢做手術。

但咁樣根本治標不治本！

我哋努力解釋病情嘅時候，主人只係著重點樣醫好隻動物。一次又一次，講完又講，主人都係無做好家居安全，你肯使錢醫唔等於你真心了解你隻狗嘅需要呀！

希望各位動物主人多 D 從你嘅貓狗嘅角度諗下，除咗照顧佢身體上嘅需要，亦請嘗試了解下佢哋嘅心理需要。

希望喺呢度可以同大家交流下呢方面嘅經驗同心得。😄