@Yaserius التشخيص بتاع أن ألحان سيد درويش بتسري فى ألحان عبدالوهاب يتجلّى فى عشقت روحك إللي فيها كثير من أنا هويت وانتهيت وخاصة المقدمة

@Rakia هو داخل الحجازكار كردي زي سيد درويش بالظبط، فيه أمثلة كتير تانية من الاقتباسات زي يادي النعيم اللي فيها العربجية مثلًا، بس اخترت عشقت روحك لأني شخصيًا باحب الدور دا وكمان عشان هو مش مشهور قوي، بس الصنعة ودي تحسب لعبد الوهاب هي في الهروب من الاقتباس مش في الاقتباس نفسه

@Rakia في العرض الأول هوجمت على أساس إني كاره لعبد الوهاب، مش عارف إزاي حد يقضي سنة بحث عن فن شخص هو كارهه 😀 لكن باحث الفيلم الوثائقي بيكون آخر حد بيسجل لقاءه فبالتالي بيملأ فراغات كل الضيوف قبله وبيضطر يركز على نقاط تدعم توازن السرد، لذلك لعبت دور محامي الشيطان وبان إني باهاجم عبد الوهاب لأنه من سبقوني في التسجيل كان أغلب كلامهم في المديح والوثائقي لازم يكون متوازن لا مدح مطلق ولا ذم مطلق

@Yaserius أومال أنا ماحسيتش إنك بتهاجمه ليه؟

@Rakia عشان حضرتك تعرفيني 😀 البعض اللي شافني بس وما يعرفنيش أعتقد كدا، رغم إني اللي مختار عنوان الفيلم مع المخرج شريف عزت، واتفقنا إنه العنوان أكتر شيء يعبر عن فن محمد عبد الوهاب.
عامة الجمهور مالوش ميزان، أنا سمعت مدح كتير عن الفيلم واشتغلت حلقات السينما تغني بسبب الفيلم دا، في نفس الوقت قرأت هجوم كتير على إن الجزيرة الوثائقية تشوه تاريخ عبد الوهاب بفيلم مسيء 😂😂😂

@Yaserius علشان اشتغلت بحيادية تامّة ولم تقع فى حب العميل (على رأي المخابرات فى رأفت الهجان😂)

@Rakia 😂😂😂
أنا ما باحبش أي عميل باتكلم عنه، باحب أعمالهم، حلقات السينما تغني الوحيد اللي أظهرت حبي الشخصي له هو كارم محمود ودا جاي من الجيرة واني شفته كتير في طفولتي وكنا والدي وأنا بنصلي جنبه في نفس الجامع صلاة الجمعة فأظهرت دا وقلت إنه إلى جانب فنه كان انسان لطيف جدًا وحضوره خفيف، لكن البقية ما عرفتهمش شخصيًا

@Yaserius حتى لو معرفتهومش ممكن الواحد يحب حد ويحب عمله وممكن يحب عمل حد ومايحبوش؛ يعني مثلاً أنا بحب أم كلثوم شخصياً على الرغم من كل إللي اتقال عليها وطبعا بحب أعمالها ولكن مش بحب شخصية فيروز لكن بحب أعمالها جداً

@Rakia أنا علاقتي بأم كلثوم عجيبة شوية، ما باحبش حاجات كتير في شخصيتها بس فاصل الصوت والغناء والتمكن الرائع من التطريب عن شخصيتها، لأنه شخصيتها نفسها معقدة ولها وجه عام ووجه خاص، في الوجه الخاص هي ست بتقلش قلش مكشوف جدًا، والقلش دا وصلني عن طريق صديق أستاذه صديق شخصي لاحمد رامي ومش هاكتب عنه في .
يوم من الأيام خالص
في المقابل تعاملها مع الجمهور اللي بيقابلها لأول مرة كان راقي جدًا، أستاذي قابلها مرة واحدة في شبابه أثناء دراسته في القاهرة، كانت حفلة خيرية وانتهز فرصة دخول وفد عربي لها في الاستراحة

@Yaserius ابني علشان عارف إني بحبها جاب لي كتاب رتيبة الحفني إللي كتبته عنها وعلشان أنا عيبي الكبير جداً إني لما أقرأ بيكون لمتعة القراءة فقط مش للتعلم أو المذاكرة فا مش باتذكّر كثير منه، لكن أكثر حاجة علقت فى ذهني منه لما الموجي لحن لها حانة الأقدار وكلمته قالتله: إيه إللي أنت عملته ده؟! الراجل أتخضّ ياعيني، أتاريها كانت مش مصدقه الجمال

@Rakia مشكلة كتب رتيبة الحفني إنها بتكتب أي حاجة سمعتها، بس دا مش مستغرب على شخصية أم كلثوم، كمال الطويل حكى في لقاء عن أغنية من نفس المسلسل هي غريب على باب الرجاء، وإنها وهما بيسجلوا عبد الوهاب حضر بالصدفة فقالت له الأغنية اتشمت يا كمال ومش هتكمل، وبالفعل كمال الطويل بعدها حس الأغنية مش بنفس المستوى فما صدرتش فقالت له صدقتني بقى

@Yaserius الأغنية دي من كثر حبي فيها وجنوني بها برضه ابني جايبهالي شريط تسجيل كاسيت من إياهم دول وكنت باحطها فى كاسيت العربيه تخلص أرجّعها تاني وهكذا لما جننت إللي بيركبوا معايا، وخصوصاً الفقرة بتاعة ولى فى مقام الوجد حال

@Rakia إسماعيل له مقال حلو عن وردة ورد عليه صلاح باديس وهو رد على الرد، بعدين كتب مقال عن شادية ودي آخر حاجة نشرها في معازف، بعدين بطل يكتب عن المزيكا مش عارف ليه

@Yaserius اسماعيل تخصصه كان الكتابة بالانجليزي أساساً وموضوع الكتابة فى معازف كانت مرحلة غير أنه اختلف مع صاحبها اختلاف حاد وحس أنه غير مُقدّر لأنه كان بيحضر للمقال وبياخد منه شغل رهيب لأن الموسيقى ماكانتش تخصصه تخصصه كان الكتابة السياسية بس أنت عارف خطورة الحكاية دي لدرجة أنه بدأ ياخد معايا دروس موسيقى أيام ماكنت باخد مع واحد كان بيجيلنا أنا وهو علشان يقدر يحس إللي بيكتبه

@Rakia عارف صاحبها ومختلف معاه وبطلت أنشر معاهم، بس هو كان بينشر في مدى مصر كمان وتوقف. مهم طبعًا ياخد الحكاية بجدية، أنا شفت ناس كتير مش عاوزة تاخد الموضوع جد وتكتب وخلاص لدرجة في مدرسة الكتابة لما كنت باتكلم في جلسة عن تاريخ الأسطوانة والقوالب الغنائية اتسألت سؤال ما فهمتوش، واحدة سألتني هو لازم نعرف الكلام دا عشان نكتب عن الموسيقى !!! وقلت لرئيس الموقع ابقوا اختاروا ناس عندها استعداد تتعلم وكانت النتيجة ما دخلنيش السنة اللي بعدها في المحاضرين 😂

@Yaserius هو عامل حسابي فى موضوع الكتابة فى مدى لأني استحلفته بكل ماهو غالي أنه ما يشحطتش قلبي عليه، لكن هو صديق شخصي للينا عطالله وكان حاضر تكريمها فى السفارة الفرنسية من فترة بسيطة والحمدلله هو حوّل كتاباته فى الكام سنه إللي فاتوا للفن المعاصر وكان عامل شغل جميل فى كتاب ال MOMA (معرض الفن الحديث) وحضر نزول الكتاب فى امريكا
ربنا يوفقكم كلكم يارب🤲🏻

@Rakia مدى مصر برضو عندهم أسلوب غريب، كلموني عشان كتاب يخص الموسيقى المصرية وأتميت مقالي وبعته من سنة قبل رمضان، ولغاية دلوقت لينا ما بلغتنيش أي تعديلات، رغم إني قبضت مكافأة المقال، في نفس الوقت كلمتهم كذا مرة إني عاوز أنشر مراجعة ألبوم فيقولوا لي هنبلغ ليلى محررة القسم تتصل بيك، وحتى مها النبوي خطتنا في إيميل واحد فليلى دي ما ردتش !
حاجة سيئة إنه مواقع بتقول انها بديلة تعمل كدا فتوقف مشاريع كتابة ممكن تكمل

@Yaserius هما بيتحاربوا حرب ضروس ، لكن ده مش مبرر للتصرفات دي، إللي برضه اسماعيل قاللي إنها حصلت معاه