中國人有「清官情意結」，對文人有一堆揾老襯要求例如「文人風骨」，但對於統治者同自己就完全冇要求。

中國人成日鬧貪官，但偏偏對於貪官苛政除之不盡嘅原因，譬如皇帝專權吝嗇、民眾對壓迫逆來順受等等，卻含混不理。若有人指出貪官、賣國賊之產生，人民亦有責任時，呢個人會被老百姓打為為貪官說項。結果五千年以來，貪官惡政不絕。有咁嘅情況，係因為中國老百姓長久以來缺乏對人性深層認識同批判，習慣非黑即白，忠奸對立嘅二元思維。而文人，只係老百姓同統治者用黎掩飾自己思維缺陷嘅遮醜布，所以先有「文人風骨」出現。

但响公民主導嘅民主自由社會，政客到期就要下台，私德問題冇咩大不了：邱吉爾係個酒鬼、羅斯福對妻子不忠、法國人從來唔在乎私生活是否檢點。美國學者Walter Williams不久前撰文，批評前總統卡達雖然係個公認嘅好人，但處事軟弱糊塗，亦係公認係最差總統之一；相反克林頓，以美國標準而言，可謂私德敗壞，公開撒謊而鬧出彈劾危機，但反而內政外交都成績不俗，經濟造好。

選領袖唔係選好人聖人，而係有能者居之，只要唔係殘民為樂嘅癲佬，而係對選民負責，說到做到，施政有方，就係合格，呢個係常識。

#SS