接近九點有隻貓黎睇排尿問題，開頭話係貓女，咁都安心 d，因為貓女唔會塞尿道，點知一抱隻貓出黎，咦？右耳剪咗嘅？

香港有流浪貓絕育計劃，即係捉流浪貓去絕育之後放返原地，等佢哋唔再繁殖，係減少流浪貓數字嘅最有效同埋最人道嘅做法。為免義工唔小心捉返同一隻貓去「翻閹」，已絕育嘅流浪貓都會剪耳做記認。剪耳係男右女左，我重覆一次，係男右女左。

咁一見隻貓右耳剪咗，我就話你呢隻係仔黎架喎！主人新手養貓，隻貓只係領養咗三個月，而比貓佢嘅人話隻貓係女，佢哋唔識睇唔出奇。

貓仔排尿困難同貓女係完全兩回事，因為貓仔好易尿道閉塞，係急症要即通，否則會死。

一搞清楚貓貓性別，醫生就摸下膀胱，恭喜你中獎了！隻貓塞咗尿道。

於是拿拿臨開波通返尿道，過程好順利，無嘢塞住，d 尿又無血，估計係因為情緒問題影響到膀胱炎，再影響到尿道痙攣所以痾唔到尿，呢種情況無需住院，但要仔細觀察貓貓黎緊幾日嘅排尿情況。

然後我就非常耐心同仔細地講解點樣餵藥 (包示範)，教埋主人點樣減低貓貓生活壓力，講下講下，就十點半了。

主人 (新客，一對夫婦) 全程用好仰慕嘅眼光望住我，搞到我自豪得黎又有少少害羞。