早五六年前我都遇上人生中一個好嚴峻嘅考驗 (女人嘅難題主要都係黎自感情生活啦，唔使估，你一定會估中)，嗰陣我遭受好大嘅打擊，我嘅世界瀕臨崩潰，我完全唔知應該點樣處理。

有一年時間我持續情緒低落，差不多每晚都係喊住瞓，瞓醒又要笑住返工。循環不息。

其後兩年寄情工作，情緒問題開始有改善，至少無乜喊住瞓，但困擾我嘅問題仍然未解決到。

前後至少三年，我先可以真真正正從打擊之中企返起身。

所以我話 d 人郁 d 就話自己情緒病乜乜乜，我唔係講緊風涼話，我係要你哋睇清楚自己嗰 d 到底係咪真係情緒病。

人生幾十年有邊個無遭遇過挫折？唔係我特別硬淨所以可以企返起身，而係我分得到呢 d 唔係情緒病，而係人生經歷，再辛苦都有過去嘅一日。

真正嘅情緒病，真正嘅抑鬱症係無原因下感到絕望，連想著手處理都無從入手，對於呢 d 情況同病者講句 [睇開 d] 係無用嘅，呢 d 先真係要搵醫生治理。

大部份自以為係情緒病嘅人其實只係生活上受咗挫折覺得唔開心，因受挫折 / 打擊感到唔開心係絕對正常嘅反應！唔該唔好混為一談！