Mastodawn

因為我養貓，所以對貓嘅情緒會有比較深刻嘅認識。今日講講貓嘅情緒病。

貓貓的而且確會因為情緒問題 / 生活壓力導致生理問題，最常見嘅係下泌尿系統嘅毛病。(次常見嘅係因為情緒困擾而不斷 Lam 毛，類似人嘅咬指甲)

泌尿系統係腎臟 ~> 輸尿管 (由腎臟通去膀胱嗰兩條管道) ~> 膀胱 ~> 尿道 (將尿液排出體外嗰一條管道)。

下泌尿系統即係 [膀胱 ~> 尿道] 嗰一 Part。

研究顯示，大概有七成嘅膀胱炎 / 尿道炎係屬於自發性，亦即係話因為情緒 / 生活壓力而導致。

當我哋用人嘅視覺去睇，會好疑惑貓貓一日淨係識瞓同食，壓力來源到底係邊度？

其實貓貓係比較喜歡獨處嘅動物，要佢同其他生物(包括主人！) 共處一室，本身已經構成好大嘅生活壓力，即使你見到佢哋好似好老友，有時會互 Lam，有時會攬頭攬頸都好，唔好忘記佢心底依然係比較希望有獨處嘅空間。

貓貓聽覺亦好靈敏，任何噪音都可以打擾到佢嘅正常休息 (佢哋正常休息時間大概係每日 16 ~ 18 小時)。

貓嘅嗅覺亦比人靈敏，部份貓貓甚至有潔癖。

點樣減低貓貓嘅生活壓力？下篇再講。