見到熱城為facebook賣用戶資料護航，甚至搬埋「度度都賣所以冇分別」呢啲五毛邏輯出黎，反智同墮落莫過於此。

商業上有個定律，就係凡身為一個「品牌」，就必定有穿崩之時，評價由讚嘆變成質疑，稱為Galileo Moment。如果夠醒目，就會發現梅鐸、雅虎呢啲例子。尤其雅虎，facebook今次事件只係雅虎沒落嘅翻版。

2003年9月12日，中國異見人士王小寧用雅虎信箱向境外投稿，雅虎向中國政府提供用戶資訊，令王小寧因「煽動顛覆國家政權罪」判處十年徒刑。雅虎公司直接導致王小寧入獄十年，結果搞到要向有關受害人作出經濟賠償。

然後2005年4月30日，湖南長沙市中級人民法院以「非法向境外提供國家機密罪」判處新聞記者師濤有期徒刑十年。案中雅虎香港控股有限公司向中華人民共和國國家安全部提供用戶個人資訊，國安部從而得以確認發送電子郵件者位址及身分，作為法庭證據指控記者師濤。

以上兩起事件，令當時CEO楊致遠俾美國國會質到口啞啞。結果大眾由早年一開機首頁就係雅虎，用雅虎電郵，立即轉用其他公司，例如google同facebook。

歷史一早顯示，冇一個平台可以千秋萬世。