我唔係一個 Hardcore 基督徒，我唔返教會，唔睇聖經 (近日開始當故事書咁睇舊約，睇睇下又停咗)，無每日靈修，無每日祈禱。

但心底入面我相信神嘅存在，或者我咁講：我相信有超自然嘅力量存在。呢種信念同宿命論嗰種唔同。

總之我相信有一種勁過我哋嘅力量存在，佢係唔係全知全能？I don‘t fucking care！總之佢勁過我，我拜服於佢嘅力量。

有無永生呢 d 我唔在乎，我在乎嘅係真理。是非黑白對於我黎講係支撐我整個人生嘅全部。所以如果有日有人有證據證明呢個世界純粹係火星撞地球撞撞下咁偶然撞出黎，我絕對會崩潰，然後或者可能會自殺。

偶然我得閒得滯嗰陣會祈禱，而我所祈求嘅大多都係 [求神與我同在，教我明辨是非]。

咁多年以黎，無論我做 d 乜嘢 (甚至係而家打緊呢篇嘢都好)，我總感覺到內心有 d 奇妙嘅指引，我唔識分到底呢 d 奇妙指引係神嘅指示定係所謂嘅靈感定係單純黎自我個人。

約翰福音 1：1

太初有道，道與神同在，道就是神。

如果真係有神，我對神嘅唯一請求係：常與我同在。

關於道關於神，各有各說法，越聽得多越迷茫，終於，我悟出五個字：我自求我道。

願互勉之。